Grwpiau cymunedol yn derbyn cyllid gan Ddŵr Cymru

ros y tair blynedd diwethaf, mae Dŵr Cymru Welsh Water wedi buddsoddi £23 miliwn mewn gwaith i uwchraddio'r pibellau dŵr glân yng Nghwm Rhondda Fach.  

I ddiolch i'r gymuned leol am eu hamynedd yn ystod y gwaith, mae'r cwmni nid-er-elw wedi cynnig cyfle i grwpiau cymunedol lleol dderbyn cyfraniad o £250 i'w cynorthwyo i gynnal gweithgareddau er budd y gymuned gyfan.   

Cafodd pedwar grŵp eu dewis ar hap i gael £250 yr un ar gyfer eu prosiectau. Un o'r grwpiau llwyddiannus oedd clwb rygbi plant a phobl ifanc Tylorstown, a sefydlwyd i helpu pobl ifanc Cwm Rhondda Fach i  roi ffocws ar chwaraeon a dod yn aelod o dîm lleol.  

Dywedodd Jason Cook, aelod o glwb rygbi plant a phobl ifanc Tylorstown: "Trwy weithio ochr yn ochr â rhwydweithiau o gymdogion, ysgolion a grwpiau cymunedol, rydyn ni'n gallu hybu manteision chwaraeon o ran iechyd a lles pobl ifanc. Bydd yr arian yma'n ein helpu ni i ehangu'r clwb fel y gallwn gefnogi mwy fyth o bobl ifanc a'u cynorthwyo i lewyrchu yn y gymuned leol.” 

Dros y tair blynedd diwethaf, mae'r cwmni nid-er-elw wedi cyfrannu dros £20,000 at dros 60 o grwpiau cymunedol ar draws Cwm Rhondda Fach. Mae'r arian yma wedi helpu i gynnal amrywiaeth o weithgareddau fel chwaraeon, cerddoriaeth ac offer celfyddydol, offer swyddfa, llogi ystafelloedd, a darparu adnoddau iechyd meddwl a lles.  Mae rhywfaint o'r cyllid wedi mynd i feithrinfeydd, dosbarthiadau addysg i oedolion ac i grwpiau sy'n hyrwyddo cysylltiadau cymunedol hefyd. 

Dywedodd Claire Roberts, Pennaeth Cysylltiadau Cymunedol Dŵr Cymru: “Rydyn ni'n gwybod bod ein gwaith i uwchraddio'r pibellau dŵr wedi effeithio ar lawer o'n cwsmeriaid sy'n byw yng Nghwm Rhondda Fach dros y tair blynedd diwethaf ac rydyn ni am ddiolch iddynt am eu hamynedd yn ystod y gwaith. Cwmni cymdeithasol-gyfrifol ydyn ni, ac rydyn ni bob amser yn awyddus i gynorthwyo cymunedau lleol, felly darparu cyllid i gynorthwyo'r gwaith rhagorol y mae'r sefydliadau hyn yn ei wneud yw'n ffordd ni o roi rhywbeth nôl er budd y gymuned leol yng Nghwm Rhondda Fach".